Компьютер худалдаж авахдаа юуг анхаарах вэ?

Өнөөдөр компьютерийн хөгжил маш хурдтай явагдаж бараг л өдөр бүр шинэ технологи нэвтэрч байгаа нь хэрэглэгчдэд маш их боломж авчирч байгаа боловч сонголт хийхэд зарим талаар төвөгтэй болж байна. Хэрэглэгчид компьютерийг худалдан авахдаа хэдэн жилдээ хоцрогдохооргүй байхаар гэж сонгох гэж оролддог боловч компьютерийн хурдтай хөгжлийн өнөө үед энэ нь боломжгүй болоод байна. 1 жилийн өмнө авсан хамгийн сайн үзүүлэлттэй компьютер нь өнөөдөр зах зээл дээр байгаа дундаж үзүүлэлттэй компьютер шиг, 2-3 жил болоод хамгийн хямд компьютерээс ч доогуур үзүүлэлттэй болох магадлал өндөр байна. Гэхдээ энэ нь компьютерээ  заавал соль гэсэн үг биш, уг хэрэглэгч тухайн үед хэрэглэж байсан үйлдлийн систем, хэрэглээний программууд, холбон ажиллуулж байгаа тоног төхөөрөмжүүддээ сэтгэл хангалуун байвал цаашид хэдэн жил ч хэрэглэж болох юм. Компьютер худалдан авахынхаа өмнө та өөрийнхөө хэрэглээг тодорхойлох хэрэгтэй. Компьютер шинээр авах гэж байгаа хэрэглэгчдийг хэд хэд хувааж болно: -       Шинэ хэрэглэгч – огт компьютер хэрэглэж байгаагүй, компьютер хэрэглэж суръя гэж бодож байгаа -       Компьютерийг сургууль, байгууллага дээрээ хэрэглэж байсан -       Хэрэглэж байсан компьютер нь шаардлага хангахаа больсон -       Компьютерийн мэргэжилтнүүд – Мэргэжлийнхэн, тоглоомчин, компьютерээ өөрөө ухаж төнхөж янзлагсад, график дизайн, CAD/CAM, дуу дүрс боловсруулалт зэрэг маш өндөр хүчин чадалтай компьютер шаардсан хэрэглээний программууд ашигладаг хүмүүс Мэдээж сүүлчийн ангилалд багтах хүмүүст компьютер хэрхэн авах тухай зөвлөх шаардлага байхгүй, тэд өөрсдөө хүмүүст зөвлөдөг, тогтмол интернет болон мэргэжлийн ном сэтгүүлээс бүх мэдээллийг цаг тухайд нь буюу цагаас нь түрүүлээд мэдчихсэн улс байдаг. Иймээс доорхи зөвлөгөө нь эхний 3 ангилалд багтах хүмүүст хамарна. Иймэрхүү зөвлөгөөг ер нь 3 сар бүр өөрчилж байхгүй бол бараг бичигдэж байх үед л хуучраад байх болжээ. Эхлээд танд ямар компьютер хэрэгтэй байгааг тодорхойлно: Тогтмол зөөвөрлөх шаардлагагүй гэр буюу ажил дээрээ хэрэглэх, дундаа хэрэглэх  - Энэ тохиолдолд Desktop буюу ширээний компьютер сонгоно. Ширээний компьютер нь ижил чадлын зөөврийн компьютерээс хямд, өргөтгөх боломжоор илүү, засварлах боломжтой байдаг. 2. Гэр,ажил, томилолтоор явах зэргээр тогтмол зөөвөрлөх шаардлагатай – Энэ тохиолдолд зөөврийн (Notebook, Netbook, Laptop) компьютер тохиромжтой. Зөөврийн компьютер нь авсаархан, дуу багатай, баттерейтэй тул тог тасрахад ажиллах боломжтой, ижил чадлын ширээний компьютерээс үнэтэй (гэхдээ сүүлийн үед үнийн зөрүү эрс багасаж байгаа), өргөжүүлэх засвар үйлчилгээ хийхэд үнэтэй заримдаа боломжгүй байдаг. Ихэнх хэрэглэгчид хамгийн хямдын зэрэгцээ хамгийн хүчин чадалтайг, хамгийн универсалыг сонгох дуртай тул ширээний компьютерийг ихэвчлэн сонгодог. Гэхдээ сүүлийн үед үнийн зөрүү багасаж байгаа тул зөөврийн компьютерийн хэрэглээ ч эрс нэмэгдэж байна.